Depués de un mes ensin pasar per equi vuelvo pa dávos el caberu avisu de que mañana, dí 10, tais toos invitáos a la celebración del venti aniversariu de la Banda Gaites Noega. A les 9 de la nueche presentaremos un espectáculo denomináu "Poema sinfónicu" nel que se mece la música tradicional con otra estaya estilos musicales p'acompañar a los poemes de Fran Molinero y Lluís Xabel y nel que la Banda de Gaites Noega tará respaldada por un quintetu instrumental formáu por Eduardo García Salueña, Héctor Braga, Dani Álvarez, Horacio A. García y Eva D. Toca; asina como col afitu de Anabel Santigo, la Banda de Gaites Llariegu y el grupu de baile de Fitoria como artistes convidáos.
Asina pues, nun lo digo más vegaes, espero que vayáis toos a la Plaza l'Ayuntamientu mañana a les 21:00 hora zulú y entréis n'un trance psicotrópicu que vos faga aplaudir hasta quemar les manes (la droja nun la ponémos nós) y que con ello nós podamos descansar en paz depués de tantu tiempu de ensayu. Asina los noegos podremos descansar de venos tolos dís los focicos (¡que ya nos fedemos!)
Pongo un vídiu d'un dí d'ensayu.
P.D.: Podéis siguir les peripecies de Noega nel CaraLlibru (Facebook pa los foriatos) y en Twitter (@bandanoega)
Fai 3 dís cumpliéronse 5 años de la muerte de Carlos Redondo y Igor Medio, miembros del grupu Felpeyu. Foi un acidente tráxicu que dexó a la música asturiana güerfana de dos de sos pás más importantes. Abúltame escoso tolo que yo pueda dicir sobre ellos, porque tolo bueno ya ta dicho y malo nun hai.
Namái me prestaría apuntar que les persones nun muerren hasta que son escaecíes dafechu por tolos que les conocieron. Y por eso Igor y Carlos van siguir tiempu enforma ente nós, porque somos munchos los que entavía nun los escaecimos, y vamos tardar en facélo. Mentres quede daquién que los recuerde,siguirán ente nós.
Namái, nun escribo más. Gracies por todo Igor y Carlos, equí seguís vivos.
El vídiu qu'inspira esta entrada aportó a mí por mor de Gorka, el profesor de gaita del Centru Asturianu de Vitoria. Enantes de venir a Vitoria yo yera un poco vuelatrenes gaiterilmente falando, pero como mucho tirábame a les bretonaes (que no a les bretones), pero fue dar con esti especimen gaiteril (Gorka me refiero) y entráme nel cuerpu los diaños de los cromatismos, los gaitangos y demás perversiones que de xuru darán perceguera a los más puristes y tradicionales gaiteros ( sí, sí, los más tradicionales, vamos, los que toquen ensin afinar). Siéntolo enforma, pero soi feliz siendo un folki pervertíu. Viva la perversión.
Y como exemplu de perversión equi tá el citáu vidiu. Nun sé que ye peor, si escuchar al hermanu flacu de James Brown martillar la gaita, o ver a esa reciella pelamangos que tan detrás, cual caóticu harén de psicotrópicos merluzos.
El llunes foi'l 67 aniversáriu del Dí D, el dí nel 160.000 soldaos y paracaidistes estadouxinidenses, canadienses, británicos, franceses y polacos asaltaron la fortaleza de Hitler que tornaba Europa. El desembarcu de Normandía. Valdría facer milenta homenaxes cada añu porque cada soldáu que punxo un pie n'aquelles sangrines playes o salto d'un avión a un ciélu estráu de bales y proyeutiles d'artillería merez el nuesu respetu y admiración. Pero nun lo voi facer porque de xuru acabaría coxicando de demasiáu proamericanismu, (la verdá ye que soi bastante proyankee), y muncho más nestos casos, porque, gústemos o non, débemos-yos muncho a los yankees ya que gracies a ellos agora mesmo nun tenemos una esvástica tatuada nel culo. (Sí ya sé que dexaron seguir a Franco y tal y tal, pero si nun ye por ellos, Francu hubiere acabao sometíu a Hitler, como toa Europa, y les coses hubieren sido enforma peor).
Pero esta entrada nun nagüa por ser una crítica política o hestórica, ye cenciellamente un homenaxe, un homenaxe xeneral a tolos homes qu'elli llucharon, n'especial a los qu'ellí morrieron, pues como dixo Winston Churchill: "nunca tantos debieron tanto a tan pocos". Pero pol mi gaiterismu natural güei va ser homenaxe concretu a Bill Millin, el gaiteru.
Bill Millin, "The Piper" Millin.
Bill Millin foi'l gaiteru personal de Lord Lovat, comandante de la 1ª Special Service Brigade, que desembarcó na primer oleada na playa "Sword" el Dí D. Lord Lovat yera un típicu aristócrata británicu y l'unicu que caminaba tranquilamente pela playa al son del compás que marcaba Millin, mentres tolos soldaos s'arrastraben tragando sable. El propiu Bill Millin recuérdalo asina: "Un di de mayu de 1944, Lord Lovat díxome que taba formando una brigada especial de comandos y quería que yo me xuniere a ella y tocare la gaita. La Oficina de Guerra prohibiera los gaiteros en combate, pero Lovat díxome que nun me preocupare por eso y aseguróme que yo sedría l'únicu gaiteru tocando en Normandía. Tomélo como un honor.
El gobiernu británicu prohibiere a los gaiteros tocar en combate pola gran cantida de baxes que sufrieron demientres la Primer Guerra Mundial, cuando los gaiteros marchaben al frente de les chiflaes cargues frontales escontra les trincheres alemanes. Sicasí Lovat fexo casu omisu de la orden y reclutó a Millin como gaiteru de brigada.
La brigada de Millin foi de les primeres en desembarcar, con so gaiteru tocando "Hielan Laddie". Lovat pidió a Millin que paseare a lo llargo la playa tocando "Road to the Isles". Un soldaú alemán diría depués que nun dispararon a Millin porque camentaron que taba llocu. Nun taben mui desacertáos. Bill Millin tocando pa unos soldáos en 1944.
La hestoria de Millin debería facénos camentar que la gaita nun val namái que pa la romería, la sidra ya'l baile. Todo eso tá perbién, sí, pero la gaita ye mundo más qu'un aperu folclóricu y merez que ser tratada col honor que se-y debe, non simplemento llevando a les romeríes a facer el mangante o llimitándonos a usála p'acompañar un baile. Pongamos fin al somorguiamentu de la gaita, creyamos no que facemos y seamos orgullosos d'ello. Entavía tenemos muncho que deprender de los escoceses; lo primero a marchar con orgullu.
Bill Millin morrió'l 17 d'agostu de 2010 en Devon, Inglaterra, a los 88 años.
John Millin, fíu de Bill Millin, nel homenaxe que se fai tolos años n'honor al gaiteru, al que van más de 400 gaiteros y percusionistes de 17 países.
Toi d'esámenes y tengo pocu tiempu y menos ganes d'andar actualizando el tendeyón. Pero agora que los castrones los albañiles danme un minutu de descansu ente barrena y barrena, aprovecho pa facer una breve defensa de la elgancia más clásica, orgullosa y altanera.
Mires onde mires, anguaño nun ves más que faltes de respetu, insolencia y desamor propiu. Si non, nun talando como la xente ye capaz de dir pela cai, paráse a mexar n'un contenedor y darréu colocáse la güevada y echar un verde y espumosu esputu como si fuere lo más normal del mundiu. Vivimos na socieda de la falta de respetu y l'analfabetismu, y lo más triste ye que la xente ta encantao con ello. Da lo mesmo dir gochu que llimpiu pela cai, da lo mesmo dir cola dea asomando pel zapatu y la regaña aireada al frescu nordés. Homes, muyeres, vieyos y vieyes, toos ellos son felices viviendo axabazaos. Pero eso sí, luego son los primeros en torcer el focicu cuando ven a un probe pidiendo ya en criticálu por gastar les perres en vinu y mexar nel soportal. Hipócrites fios de puta, ellos son los primeros que mexen non n'un soportal, sinon en dos, tres o los que pillen, depués de pasar el dí de chigre en chigre bebiendo como gochos, escupiendo en suelu y tirando'l palillu'l pinchu a la baldosa con desdén, como si costare muncho echálu nel ceniceru. Polo menos el probe de la puerte nun cobra subvenciones del gobiernu nin desempléu.
Güei ta de moda ser un incultu analfabetu, ta de moda ver na tele a les "putes, putos y viceversa" y entavía apaez un anunciu que diz: "podéis camudar un idioma". ¿Cómo camudar? Pueden destruílu. Dende'l momentu que da lo mesmo "eskrivir" qu'escribir, en magar el momentu en que "ai ke armala xk esto lo ba areglar nadie ke benga detras". Y lo más coyonudo ye que como se te ocurra llamá-yos la atencion, yes un peperu, un reaccionariu, un facha y fáltate poco pa ser un esterminador de la concencia social y la llucha de clases. Ta nidio, el mundiu sempres lu camudaron los analfabetos, eso ye verdá, pero, ¿camudáronlu pa bien o pa mal?. Tantu orgullu que tenéis pa dir a plantávos na Puerte'l Sol, na Plaza Cataluña o onde vos salga los güevos solo por poder roncar y roncar y roncar, podíes usálu tamién p'amuesar a los que vos tan viendo dende les galeríes y les ventanes (vamos, los que tienen el poder) de que tenéis cultura, honor y elegancia abondo como pa poder tratálos de tú a tú. Sinceramente, pa mí, un puntu que nun estrema una baca d'una vaca, que nun sabe si la preposición ye HA o A, y que ye feliz regando les aceres con esputos, nun meréz el mio respetu. Y eso que yo tengo 22 años, imaxinái que camentarán los que tengan 50, que son los que vos tan mirando dende les ventanes. Nun hai falta imaxinálo, lo que camienten ya quedo amuesáo: palos pa los melenudos (fixáivos que "palos"y "pa los" aseméyense nel soníu, pero nun se escriben igual eh).
Todo esto ye una apoloxía de la elegancia y cuando pienso nesa pallabra vienenme munches persones a la tiesta, pero sin dubia la primera de toes elles ye'l gran Carlos Gardel, que ya visitare esti tendeyón n'anteriores entregues. A ver si con esto yo tamién consigo camudar el mundiu, pero pa meyor. ¡Recuperemos la elegancia clásica, l'orgullu altaneru de los Tercios de Flandes, desarrapaos, famientos y enfermos, pero orgullosos y elegantes índa na derrota!
La entrada cabera dediquéla a Ahmed Shah Massoud y prometí dedicar otra n'esclusivo a él. Y podréis llamáme lo que vos pete, menos pufista (anque según mio pá lo más guapo del mundiu ye tener pufos...).
Ahmed Shah Massoud, conocíu como "El llión del Panjshir", ñació en 1953 nel valle'l Panjshir, al norte d'Afganistán, un territoriu ocupáu por grupos d'etnia tayika. Estudió nel Licéu Francés de Kabul y depués ingresó na Universidá d'Inxeniería. Si hai que definir la actividá que definió la so vida, ésta foi la guerra, naguando sempres la completa independencia y democratización d'Afganistán.
En 1973 forma una milicia pa lluchar escontra'l réximen golpista del xeneral y principe Daud, que derrocara al rei Mohammed Zahir Shah. En 1978 una revolución dirixía pol partíu comunista afganu esbarrumba'l réximen de Daud ya entama una guerra pol dominiu del país. N'afitu del réximen comunista y naguando un meyor control d'Asia Central la URSS invade Afganistán esi mesmu añu. Massoud sigue con so llucha de resistencia nel norte, agora escontra los soviéticos. Ye n'esti momentu cuándo entama a desveláse'l xeniu militar de Massoud, quién partiendo d'una milicia armada con fusiles ya obsoletos (dellos del sieglu XIX) consigue crear una importante fuercia guerrillera muyahidín (guerreros sagraos) considerable que caltuvo a ralla a les tropes soviétiques, tornando'l valle'l Panjshir nuna zona impenetrable y teatru de les cabezaleres operaciones militares.
Tres la retirada soviética en 1989, Massoud ocupa'l cargu de Ministru de Defensa nel nuevu gobiernu presidía por Rabbani y azotáu por una guerra civil escontra la facción muyahidín más radical, los talibán. Cuando ésto se faen col control de Kabul, Massoud vuelve a abellugáse nel Panjshir, au crea l'Alianza'l Norte, una conxunción de fuercies d'estremaes etnies ente les qu'había tayikos, uzbecos, pashtunes y hazaras y cuya direción militar tuvo en manes de Massoud, gracies al cuál el valle'l Panjshir escapó tamién al control de los talibán como ya pasara colos soviéticos. L'Alianza'l Norte foi afitada por Rusia o Irán, sicasí nun contó col afitu d'EE.XX. quién entamó afitando a los talibán. Esto foi lo que llevó a Massoud a viaxar a Europa delles vegaes en busca d'afitos. Al evidenciáse les violaciones de los drechos humanos protagonizaes polos talibán, EE.XX. dirixó so afitu a l'Alianza'l Norte. Según la ONU, l'Alianza del Norte yera'l lexítimu representante del gobiernu d'Afganistán, sicasí ésto nun-y valió pa ganar l'afitu de casi dengún país ocidental.
Tres años de llucha escontra los talibán nos que'l valle'l Panjshir funcionó como una rexón independiente gracies a la resistencia de Massoud, el "Llión del Panjshir" entamo un viaxe per ocidente en busca d'afitu económicu y militar. En 2001 dió un discursu énte'l Parlamente Européu nel qu'alertaba de les conexiones ente'l réximen talibán y Al-Qaeda, anque nun foi tomáu en consideración.
El 9 setiembre de 2001, 2 dís enantes del atentáu de Nueva York, Massoud concedió una entrevista a supuestu periodista quién en realidá yera un axente d'Al-Qaeda que fexo esplota la bomba que llevaba na cámara. Asina morría Ahmed Shah Massoud, el "Llión del Panjshir". Morría de la mena más miserable y cobarde que puede morrer una persona, asesináu por una persona na que confiaba y que nin siquiera enseña l'arma con que va matar. Massoud podría haber muerto d'enforma menes, pero non asina. Un paisano que lleva trenta años de la so vida lluchando pola democratización del so país nun puede morrer a manes d'un perru integrista desquiciáu d'una mena tan cobarde.
Por esto dende equí llanzo un sinceru mensaxe d'agradecimientu a los homes del DEVGRU (el equipu seal que mató a Bin-Laden), non porque fixeren xusticia, non porque vengaren la muerte de 3000 persones el 11-S y tampoco porque eliminaren a un peligrosu terrorista, sinon porque gracies a ellos Massoud puede descansar en paz de verdá. El mundiu precisaría 10 o 12 homes más como Massoud, pero sobre todo que fueren escuchaos y respetaos.
En memoria d'Ahmed Shah Massoud (2 de setiembre de 1953 - 9 de setiembre de 2001)
Acabo d'arrancar la catadora (ordenador) pa lleer la prensa y según abre la páxina d'El País veo la feliz noticia:
EE.UU. mata a Bin Laden. Digo feliz noticia ensin sorna, porque ya diba siendo hora de que pillaren a esti desgraciáu. Osama Bin Laden (por si daquién lleva encueváu venti años) yera un islamista radical saudí, fundador del grupu terrorista Al-Qaeda, el cuálu lleva cometiendo atentaos per tol mundiu -n'especial escontra EE.XX.- en magar los años 80 del sieglu pasáu. Hasta ayeri había una recompensa de 50.000.000 dólares por Osama Bin Laden. Habrá que ver tamién que repercusiones tien esta operación, porque ta nidio que'l terrorismu islamista nun va quedar calláu énte esto. De momentu EE.XX. ya ta en másima alerta en toles rexones del mundiu au ta presente.
Lo que más me gustaría destacar de la noticia ye que Bin Laden foi elimináu por un comandu n'un asaltu d'unos 40 minutos nuna zona residencial de mansiones na ciudá d'Abbotabad, nel norte de Paquistán. Camiento qu'esi comandu taría formáu por operadores de la CIA o del CAG (los que tol mundiu conoz como Delta Force). Sicasí EE.XX. llevaba dende 2001 intentando eliminar a Bin Laden pentemedies de UAV (aviones non tripulaos) armaos con misiles, y sempres fracasó pola habilidá del terrorista pa escuendése nel momentu oportunu. Lo que demuestra esto ye que por bramante tecnoloxía que se tenga, sempres va ser preciso que la probe y valiente infantería pise'l terrén y espete la bandera. ¡Esos probes diaños! cómo dixo Plauto.
Güei va ser una entrada curtia, nun tengo ganes d'escribir más y la noticia tampoco lo precisa, desplícase sola, siguir escribiendo namái serviría pa caer nel proamericanismu más pasteleru y nun ye la mio intención, de momentu. Lo que sí quiero añadir ye que la noticia gústame especialmente porque Bin Laden foi tamién el qu'ordenó l'asesinatu d'Ahmed Shah Massoud el 9 de setiembre de 2001. Ésti home, conocíu como'l Llíón del Panjshir, foi un brillante comandante muyahidín que lluchó escontra la invasión soviética d'Afganistán ente 1979 y 1988 y depués llíderó l'Alianza del Norte, una conxunción d'estremaes etnies afganes que llucharon escontra'l dominiu talibán n'Afganistán consiguien crear una frasca d'Estáu autónomu nel norte'l país. A non muncho tardar dedicaré una entrada a Massoud como se merez. Tou aquél que se dedique a achuquinar talibanes merez tol respetu del mundiu (ale, ehí tenéis l'aporte radical del dí).
En magar un par d'años nun vemos más que noticies sobre corrupteles polítiques n'España. Ye un nuevu filón informativu, como los robos de nenos acabantes de ñacer o la violencia de xéneru. Sicasí esto tien un problema importante pues consigue (a posta, o de casualidá) que la xente identifique la corrución namái colos políticos. Si agora salimos a la cai, paramos a cualquier persona y dicimos "corrupción", esa persona retrucará: PP, PSOE, Valencia, Gurtel, falses pensiones, recalificación, etc. Pero de xuru que nun piensa: Flavio Briattore, Florentino Pérez, Vaticano, Bernie Ecclestone y tantos y tantos otros nomes que tamién salen regularmente na prensa y que xamás naide acusa de nada, cuando toos ellos empleguen les mesmes téniques corruptives que los demás.
Esto tien una desplicación fácil: a más perres se tienen, más se quieren; y la manera más fácil de ganales ye cola corrupción.
Esta introdución vien dada porque fai poco féxose oficial un nuevu casu de corrupción y malversación de fondos nel mundiu la música asturiana. Y dígo féxose oficial porque va munchu tiempu que los que tamos más o menos metíos nesto ya lo sabíemos de sobra. Nesti casu'l delitu foi cometidu por dellos miembros d'una banda gaites qu'al pesar de ser sustituidos llegalmente como miembros de la Xunta Direutiva, siguieron faciendo y desfaciendo como-yos petó, sempres n'interés propio, lóxicamente, recoyendo nel llibru de tesorería los ingresos que queríen recueyer y ensin permitir a los miembros de la banda nin a la Xunta Direutiva lexítima consultar los llibros d'actes de l'Asociación. Fonos los restantes miembros de la banda los que se decidieron a facer esto público y pa ello crearon una páxina web na que cunten d'una frasca enforma entretenida tolos acontecimientos, dende l'orixe hasta la situación actual, col tema nos xuzgaos. Malversaciones, falsificación de documentos, Actu de Conciliación que concluye ensin posibilidá d'avenecia pola negativa del demandáu a aceptar les desixencies de los demandantes, etc. Vamos un culebrón atómicu.
De xuru que munchos de los que lleáis esti blog (si ye que daquién lu llee de verda o llimítase a ver los vídios) ya sabréis de que banda se trata. Yo nun voi dicir el nome, sólo que ye de Xixón, lleva gaites en Si bemol y va de blanco y coloráo. Pero por si dalgun calamar o calamara (hai que ser correutos que vienen eleciones...) entá nun se dió cuenta, esta ye la web na que ta tola información: Pínchame y disfruta.
Lleéila, paga la pena echar media horina lleendo eso pa dáse cuenta de que non namái son malos los que salen na tele con cara mafiosos. Namái se me ocurre añadir: ¡Ay queridu mafiosu! Paezme qu'escaeciste que tú jedi serás cuando fabes comerás.
Esti artista ye de Comillas (Cantabria) y dedícase a facer gaites y whistles. Fai sobre too gaites gallegues pero tamién asturianes si se-y pide. Yo toque con una asturiana d'él y suena bien la verdá. Pero polo qu'escribo sobre él equí ye por coses rares como una gaita que toi convencíu de que lleva payón en cuenta payuela y ésta que vos pongo de Do Grave. Ye un trastu de su madre, pero mal del todo nun suena, un poco irlandesao. Ésti tio ye un culu inquietu y sempres anda enredando con estes pijaes. Por exemplu patentó la "micropolilla", un furaquin chiquitcu nel bisel del furacu del La (nun recuerdo bien si ye nel La o nel Sol, pero creo que nel primeru) pa qu'afine'l Si, y funciona (yo sempres pensé que lo inventare él, pero acabo enterame que fonon los gallegos). Tamién fai whistles de maera (según me cuntaron copiaos de los de Joe Swayne, el que suministra a Carlos Nuñez por exemplu) a un preciu módicu d'unos 120€.
Too esto faime pensar que daqué ta fallando nel mundiu la gaita asturiana, porque manda coyones que tenga venir un cántabru (sin ánimu de ofender a naide, que conste) a innovar na fabricación de gaites mentres los artesanos patrios siguen pesllaos nos sos tendeyones montunos cola sesera igual de pesllada. Esti home ufierto el sistema de micropolilla a dellos artesanos d'Asturies y toos ellos respuendieron qu'eso yera una babayada y que nun valía pa ná. Pues yo probe esa babayada y funciona bién. La cosa ye lliberar presión pa qu'afine, que más dará facelo abriendo el Mi que faciendo un furaquín piquiñu nel La pel qu'escape más aire. La gaita asturiana ya ye un instrumentu primitivu de por sí, pero paezme que los más los artesanos son tan primitivos como él y niéguense a meter cualquier cosa que pueda fende-yos los sos esquemes tradicionales. Otra desplicación pudiera ser que son unos vagos y que si tienen daqué que vende bien, pa qué se van esmolecer n'investigar más.
Pa toos aquéllos que por nun conocer a David (asina se noma'l protagonista d'esta entrada) y porque seya cántabru crean que nun hai que presta-y atención a lo que fai, voi decir que se fixen tamién en Seivanne que tién cerca venti persones nel taller y sempres ta investigando y probando coses nueves. Hai que siguir p'alantre porque sino seguiríemos faciendo les gaites a navaya...
Un collaciu míu taba fartucu de que'l raposu ficiere visites a les pitines aprovechando l'abrazu la escuridá y decidió garrar un perru pa que defendiere'l piteru. Hasta ehi too perféuto. El perru valía; lladraba de nuechi, gruñía; si golía un corzu, un xabalí o un raposu salía disparáu pa'l monte y podía tar tres dís perhi, pero'l númberu pites siguía menguando. Una nueche decidimos dir facer guardies pa ver qué pasaba, y ellí agazapaos como la guardia civil lo que descubrimos que'l perru nun lladraba y gruñía pol raposu, non, facíalo cuando taba dientru'l gallineru matando pites, patos, corderos y tolo que se moviere. Ayeri recordé esta hestoria cuando lleí na prensa ésta noticia: La policía ha detenido esta mañana a Manuel Sirgo, miembro de la Academia de Cine y fundador de la productora 12 pingüinos, acusado de difundir sin permiso películas antes de que estas llegaran a las salas comerciales. La noticia, difundida por los servicios informativos de TVE, ha sido confirmada a este periódico por fuentes del Cuerpo Nacional de Policía. Sirgo ganó un Goya en 2002 por el corto de animación Pollo. Junto a él han sido arrestados dos empleados de su productora.
Álex de la Iglesia declaraba: "No puedo creer que un compañero juegue con el trabajo y la ilusión de tanta gente", ha declarado el cineasta Carlos Iglesias a través de su perfil en la red social Twitter. "Hay que buscar la manera de que las películas estén en la red pero de forma legal, sigo diciendo que Internet puede ser un gran apoyo. Ojalá se pueda sacar algo positivo de esto, no sé".
Pues ya te digo yo lo que se puede sacar en positivo d'esto: la lexislación escontra la piratería tá condenada al fracasu, güei, mañana, y sempres. Nin siquiera los miembros de l'Academia, que son direutores, produtores o guionistes de cine -y que polo tanto viven de les películes que faen- la respeten. Pondría la mano a cortar
asegurando que toos ellos ven películes pirates y escuchen música baxada illegalmente y de xuru que mañana podría seguir tocandome los güevos a dos manes. Y ye que esta lexislación nunca va valir pa nada pol cenciellu fechu de que la llucha escontra los delitos precisa enforma esfuerzos del Estáu, y non namái económicos, sinon humanos, y nun hai policíes y funcionarios abondo como pa tramitar tolos delitos de piratería esistentes. Anguaño hai miles de delitos d'esta triba n'espera de ser puestos en xuiciu, y nunca van pasar de ser cencielles acusaciones. Paez que la xente nun talanta que los que s'encarguen de tramitar esos papeles son funcionarios, y esos adoratibles seres tienen un llimite, que ye más o menos de 15 centímetros, ye dicir, cuando el montón de papeles que tienen na mesa pasa d'esa altura, procédese a una suelta de llastre, ye dicir, que van pa la basura (esto dicho por un funcionariu que conozo en magar 22 años y qu'anduvo por 4 o 5 departamentos estremaos ya en toos vió y fizo lo mesmo). Y ye que nun se pueden tramitar toa esa cantidá de papeles porque depués de facelo hai qu'almacenalos nun archivu, y nun hai espaciu físicu pa guardar toos esos papeles. Esto ye asina. Si los funcionarios almacenaren tolos papeles como deben tendríen que trabayar n'acera.
Amás de la incapacidá del Estáu pa proporcionar los medios humanos precisos pa facer cumplir la llei hai otru elementu con enforma más fuerza que fai fracasar esta llei y que nun ye otru que la innata nagua del ser humanu de conseguir les coses ensin pagar, ya sea yendo a robar pintalabios y bolígrafos a los chinos, yendo a los chigres que den los mayores pinchos pa dir cenaos pa casa o conseguir películes y música de baldre. Tenéi en cuenta que la lexislación escontra los robos ye tan vieya como la propiedá privada, ¿cuánto puede ser eso?, ¿3000, 4000, 5000 años? y ya véis que la xente sigue robando. Y eso que los delitos "físicos" son enforma más fáciles de detectar y rastrear, y sobre too sempres ye más facil conseguir un testigu qu'identifique al culpable. Por esto la llexislación antipiratería tá condenada al fracasu más absolutu porque la xente va seguir viendo y escuchando gratis tolo que pueda y por munchos pirates qu'enzarren equí nun van finar col problema, porque los mayores servidores de piratería tan en Rusia, en China o sabe Dios onde. Y sinon pensái en toles películes que véis pirateas y que vienen colos subtítulos n'inglés o en ruso. ¿Por qué creéis que ye eso? Fácil. Porque la imaxen ta grabada n'un cine en Vladivostok o en Hong Kong ya'l soníu n'un cine español y por eso munches películes tienen l'audiu desfasáu, porque ye lo que pasa al empastar audiu y vídiu de mala calidá n'un formatu de mala calidá pa que la película ocupe menos y entre n'un cd. Asína de fácil. La Isla Tortuga de la piratería dixital nun tá n'España, sinon en países con llexislaciones enforma más permisives, ye de caxón. Así que señorita Sinde, si quies finar cola piratería vete camentando esnalar a Moscú.
Y dexando al marxe que la piratería pueda o no erradicáse, hai que camentar no qu'esto prevocaría. Lo que voi escribir darréu aplícase sobre too a la música porque ye verda que'l cine ye un tema enforma más complicáu. A lo que diba, ¿de verda los merluzos de la SGAE quieren facenos creer que los artistes viven de los drechos d'autor? Eso nun lo cree nin Ramoncín borrachu (sí, ya se que'l Rei del Pitu Fritu ya nun ta na SGAE, pero que se joda, que pague toles que fizo enantes). De cada cd que nosotros mercamos a 18 o 20 euros, l'artista recibe non más de 2 o 3 euros, tolo demás va pa´l señor Ramoncín y sos compinches de les productores, que son les que emburrien les lleis antipiratería. Un artista vive de los conciertos, punto. ¿O váis dicime qu'Isabel Pantoja y olé gana más perres vendiendo discos a razón de 3 euros por exemplar que dando conciertos a razón de 60.000 euros por actuación? (Eso foi lo que cobró la cabera vegada que fué a Xixón). ¿Cuántos grupos dánse a conocer gracies a les descargues d'internet? Estos grupos pequeños nun venderíen un discu nin amenazándonos con una navaya, pero gracies a internet pueden axuntar a 200 o 300 persones nun conciertu y cobrar 10 o 12 euros por entrada y si nun me fallen los cálculos eso son unos 3000 euros ye dicir, l'equivalente a vender 1000 discos, daqué imposible pa ellos porque ya nun vende cd's ni Bisbal y anque habríen descunta l'alquiler del equipu soníu si nun lu tienen o'l pagu al llocal, el beneficiu sigue siendo enforma mayor. Un exemplu coyonudu d'esto ye Russian Red, una rapacida qu'entamo a colgar les canciones que facía n'internet y agora acaba espublizar el so segundu discu, grabáu en Glasgow, nin más nin menos.
Amás voi añadir que la piratería interesa y ye espoxigada por enforma empreses de lletrónica. Enantes qu'esistieren los mp3, i-pod o i-phone ya se podía baxar música d'internet, pero daba galvana grabala depués a un cd. La espansión de toos estos cacharros foi lo que emburrió'l medre la piratería. Y agora vamos entamar a ver una nueva frasca de piratería: la de los llibros, gracies a la invención de los e-book, un cacharru al que voi dedicar prósimamente unos cuantos kilos de mierda.
Depués de toa esta parrafada dalgunos podríeis camentar: "pues si nun hai posibilidá de finar cola piratería, ¿pa qué vamos rexistrar les canciones que compongamos? Collacios merluzos, una cosa nun tien que ver cola otra, tol mundiu espera que se-y reconoza'l so llabor, pero nun creo que toos quieran que dellos mangantes s'aprovechen del llabor axenu pa lucráse personalmente (entiéndase SGAE, productores, intermediarios, etc.). Ésos son los verdaeros pirates escontra los qu'habría que lluchar. Pa torgar qu'estos "seres" s'aprovechen del vuesu trabayu esiste Creative Commons. Esta ye una organización internacional que nos dexa rexistrar gratuitamente'l nuesu trabayu (y poro, nun nos aporta beneficios diréutos pero tampoco fai que se lucren terceres persones por tar rascándo'l ñisu) y que nos permíte escueyer ente una estaya d'estrameos tribes de llicencia cola que podemos escueyer si lo que rexistramos tá abierto al usu públicu total o parcialmente o si tien de ser respetáo dafechu, si puede citáse o emplegáse pa facer obres derivaes, etc. Llicencies pa tolos gustos y que de verda torguen que daquién s'aproveche del nuesu trabayu, que ye lo que vienen faciendo Los enantes citáos, anque seya de manera llegal, y por eso tienen declarada la guerra a la piratería, porque son Ellos los que más perres pierden (nótense les mayúscules. Ye que dame miéu qu'esos "Seres" cuasidivinos me fulminen con un rayu volador o que Ramoncín entre pela mio ventana como si fuere un geo y me neutralice, acabando asina, heroicamente, con un peligrosu pirata).
La conclusión que tenéis que sacar d'esta pila mierda qu'acabo soltar (mirái si soi bonu que vos la digo yo, pa que nun uséis la cabeza) ye que sempres hubo y sempres habra lladrones y víctimes, sempres hubo lleis ya delincuentes, pero non siempre'l papel de caún d'ellos ta bien definíu, y non sempres los que roben illegalmente son los únicos que s'apropien de lo axeno. Hai que dáse cuenta d'esto pa entamar a espabilar y que nun nos toreen coño, que paezme llamentable que, por exemplu, na fiesta de Trubia (una aldea de Xixón, non la de la fábrica d'armes eh, cuidiáu con esto que podríes sufrir la crucifixión eterna pola confusión) haya que pagar 600 euros por drechos d'autor. Nun me jodas, si somos 50 vecinos (contando perros y gatos) y tenemos que pagar un dineral por poner dos altavoces y una gramola.Yo por si acasu ya nun cancio nin xiblo pela cai, nun valla ser que me llegue una factura a final de mes...
El mundiu sempres tuvo fechu mierda y por eso seguimos n'él, porque si fuere perféutu ya nos hubieremos suicidáo del aburrimientu. Si los albañiles trabayaren bien, ¿qué fadríen los xubilaos sin poder criticalos? Dientru 1000 años el mundiu seguirá goliendo a mierda lo mesmo qu'agora, porque esa ye la so esencia vital y lo que-y da gracia. Pero esto nun quier dicir que tengamos que dexar que nos den pel culo con una cotoya y qu'enriba tengamos que pagar por ello. Y pa exemplificar ésto y al tiempu recompensávos por lleer esta entrada (anque de xuru que munchos nun lo fixísteis dafechu, zánganos colmeneros siderales) voi ponévos un tema del gran Carlos Gardel.
¡Viva Barbaprieta, John Silver el Llargu, Jack Sparrow, tolos miembros de la SGAE y la perguapa ministra Sinde!. Ensin vos, el mundiu seguiría goliendo a mierda, pero nun podríemos descargar la tensión más que dándonos testerazos escontra la paré, y llega un momentu que entama a dolete la frente y dexa de salite pelu.
Ye esti un blog ensin pretensiones de nada, ye dicir, nun intenta informar de nada, nun intenta enseñar nada, nun intenta camudar nada nel mundiu que tá jodíu, sí, pero asina ye más entreteníu. Esto cenciellamente ye un furacu au voi poner tolo que se me pasen pela tiesta, dende les mayores barbaridaes sociópates (definición de sociopatía. Pa los que, como yo, tuvísteis l'honor d'educávos cola L.O.G.S.E.) hasta les alabances sobre daqué concreto (tranquilos, esto será lo menos). Sicasí tamién habrá sitiu pa comentar discos o llibros qu'aporten a les mios manes y que crea dignos de robávos 5 minutos del vuesu pervaliósu tiempu, ¡oh ocupadísimos llectores!.
La verdá ye que nunca tuve intención de facer dengúna cosa semeyada a un blog, pero como discutir con cada persona que me crucie pela cai llevaríame enforma tiempu, prefiero soltar equí tolo que quiera, que ye más rápido y más cenciello. Vamos, que si hubiere qu'identificar esti blog con una imaxen, ésta sedría la d'una montonera mierda delantre d'un ventilador industrial. Esto nun ye más que la plasmación online de les interesantísimes conversaciones que tengo col perru, que resultó ser el más atentu de los oyentes, pero que, desgraciadamente, entavía nun me contestó ná, llimítase a mirame con cara perru y gueyos de perru. El dí que me conteste retirareme de los blogs, y sedrá él quién entame a escribir les conversaciones que tien conmigo.
Bueno, entrando yá a lo importante (que ye criticar tolo que se pueda) voi entamar criticando el sitema de blogs. Cuál ye la mi sorpresa cuando pongome a enredar peles opciones de configuración y veo qu'una d'elles ye la de dexar que te pongan anuncios colos que "ganar perres". Vamos ver ho, ¿de verda ye preciso enllenar esto de mierda pa ganar 6 tristes pesetes? ¿Qué coño piensa el que lo acepta? ¿Que va sacar sobresueldu solamente espublizando nel blog anuncios de pastilles atómiques que te faen medrar la pirula o una aplicación pa'l móvil cola que puedes ver el culo de les muyeres namas que enfocándoles col aparatu? Mereceríeis la crucifixión eterna...Ye triste triste, tan triste como cuando vas a mercar y tires los 2 míseros centimos que te dan de vuelta y una paisanina que te vé dizte: "pero nun los tires, que pesetina a pesetina fai la vieya la corexina. Si los guardes nenu ya verás como dientru un tiempu tienes pa mercar daqué." Si señora, ya veo que colos 70 años que tien, fíxose millonaria sólo de guardar los céntimos de vuelta y por eso vien a mercar n'alpargates y garra les bandexes de carne que cuesten 1€ por prósima caducidá.
Cada dí el mundiu ta peor de la chapeta, pero afortunadamente agora tenéis a mí pa amenizávoslo un poco. Tranquilos que nun sedrá siempres asina, y pa compensavos por tola mierda qu'acabo soltar voi ponévos dalgo de música.
Voi inaugurar l'apartáu musical con daqué atípico, que ye un tango con gaita. Y ye que non namái de "dái manolín dái manolin dái manolin" vive la gaita ya'l tambor. Vamos ser sinceros, lo tradicional tá bien, pero llega un momentu qu'aburre un poquiñín. Equí vos pongo'l tema Libertando, del dúo gallegu BellónMaceiras (Daniel Bellón y Diego Macéiras) y que tá dientru del discu asdfasdfasdf el cuálu conocí gracies a Gorka, el mayestru de gaita y tambor del centru gallegu y del asturinu de Vitoria. El tema ye una versión del Libertango d'Astor Piazzolla, gran compositor de tangos y bandoneonista que revolucionó'l mundiu del tango y cuya bramante discografía recomiendo.
BellónMaceiras. Libertango.
Equí tá'l tema orixinal d'Astor Piazzolla.
Y con esto piesllo güei'l blog.
P.D.: Acordáivos sempres de dar los centiminos de vuelta a les vieyines, qu'elles aprécienlos de verda y quieren guardalos pa la herencia los nietos, que tendrán que dir por ella con un portapalets, pero bueno.
P.D.2: Tol mi másimu respetu y apreciu pa los vieyos y vieyes d'esti mundiu, el cuálu sedría un llugar peraburriu ensin ellos. ¡Llarga vida a los vieyos con garrote!
